Во периодот од 07.10 до 10.10.2024 година во просторите на Универзитетот Лудовика во Будимпешта се одржа курс во организација на Универзитетот Лудовика и Воената Академија Генерал Михаило Апостолски. Курсот на тема „Управување со закани во сајбер просторот“ беше поддржан од страна на Европскиот Колеџ за безбедност и одбрана (ESDC- European Security & Defence College) и Агенцијата за сајбер безбедност на Европската Унија (European Union Agency for Cybersecurity (ENISA) и двете со седиште во Брисел, Белгија.
Слушателите на курсот дојдоа од повеќе земји од Европската Унија меѓу кои Португалија, Луксембург, Латвија, Бугарија, Франција и Унгарија, имаа можност да се запознаат со најновите закани со сајбер просторот, позначајните инциденти и да ги осознаат начините за превенција од истите. Темите кои ги покрива курсот беа разработени преку интерактивна теоретска и практична настава со цел подобрување на вештините за имплементација на мерки за заштита во сајбер просторот.
Покрај придонесот во организација на настанот, Воената Академија учествуваше и со двајца предавачи. Проф. Д-р Ќире Јаќимовски и М-р Гоце Стеваноски од Институтот за Сајбер Безбедност и Дигитална Форензика, обработија две значајни теми со кои направија анализа од технички аспект на современите закани и инциденти во сајбер просторот, со што ја поставија основата за понатамошната обука на слушателите во примена на различните контроли за управување на заканите и реакција при инцидентите.
