Воената академија продолжува со една од водечките улоги во зајакнувањето на националната сајбер безбедност преку активно учество во новиот проект MkSafeNet, кој ќе го формира првиот Национален центар за побезбеден интернет во државата. Овој значаен проект, финансиран во рамките на програмата Дигитална Европа, претставува суштински чекор кон создавање на побезбеден дигитален простор за сите граѓани, со посебен акцент на заштита на најмладите.
Во рамките на проектот, Воената академија ќе биде одговорна за клучни активности во областа на едукацијата и подигнување на свесноста за сајбер заканите. Експертизата и искуството на Академијата во областа на дигиталната безбедност и одбрана ќе бидат од витално значење за успешно имплементирање на оваа иницијатива. Оваа улога дополнително ја потврдува лидерската позиција на Воената академија во развојот на националните капацитети за сајбер безбедност и заштита.
MkSafeNet ќе се реализира со грант од 673.354 евра од Европската Унија и кофинансирање од Владата на Република Македонија во износ од 10.788.800 денари, и ќе вклучува широк спектар на активности. Ова ќе опфати развој на студија со акциски план, формирање на Центар за подигнување на свесноста за интернет закани, телефон за помош (Helpline), Младински панел и Советодавен одбор.
Министерот за дигитална трансформација, Стефан Андоновски, на настанот за потпишување на Грант договорот истакна дека MkSafeNet е интегрален дел од пошироката стратегија на Владата за дигитална трансформација, усогласена со европските стандарди како „EU Digital Services Act“ и „Better Internet for Kids“.
Како партнер во конзорциумот, Воената академија не само што ќе придонесе со своето знаење и експертиза, туку и ќе обезбеди долгорочна поддршка во развојот на капацитетите за дигитална безбедност во земјата. MkSafeNet ќе претставува клучна алка во синџирот на националната безбедност, создавајќи нови можности за заштита на граѓаните и критичната инфраструктура од дигитални закани.
