Воената академија „Генерал Михаило Апостолски“ организираше свеченост на која беа промовирани новите офицери од 24. класа на питомци, и учесниците на курсевите за стручно оспособување и усовршување за почетен офицерски чин, како и новите подофицери слушатели на основниот подофицерски курс.
Настанот започна со обраќање на прворангираниот питомец Милица Перишиќ, која ги претстави успехот и посветеноста на своите колеги. Таа ги нагласи вложените напори и предизвиците со кои се соочиле за време на нивното образование и обука, и ја истакна подготвеноста на сите питомци да ги преземат своите нови обврски како лидери во Армијата.
Потоа, со свој говор се обрати деканот на Воената академија, полковник проф. д-р Митко Богданоски, кој ги охрабри новите офицери и подофицери да ја искористат можноста што им е дадена за да ги покажат своите способности и да ја изградат својата иднина. Тој истакна дека секој од нив има значајна улога во успешната приказна на Академијата и дека нивната упорност и решителност ќе продолжат да бидат нивниот водич во службата на државата.
Министерот за одбрана, Владо Мисајловски, исто така им се обрати на присутните, подвлекувајќи ги вредностите на лидерството како инспирација и пример, со кои треба да водат и да создаваат средина што овозможува напредок. Тој нагласи дека промоцијата претставува признание за нивната посветеност и потврда на довербата што им е дадена да бидат дел од институција која е меѓу најпочитуваните од граѓаните.
Свеченоста беше заокружена со говорот на претседателката и врховна командантка на вооружените сили, Гордана Сиљановска-Давкова, која истакна дека припадниците на македонската Армија се дел од едно големо семејство кое ја брани слободата, суверенитетот и територијалниот интегритет на татковината.
